Shqipëria ka mbetur jashtë fokusit të Parlamentit Europian pasi eurodeputetët që duhet të raportonin për misionin në vendin tonë kanë munguar në seancën e Komisionit të Punëve të Jashtme. Në pamundësi të raportimit mbi misionin në Shqipëri, kryetari i Komisionit të Punëve të Jashtme, David McAallister, i cili negocioi edhe për krizën politike në Shqipëri në maj të vitit 2017, i ka dhënë fjalën eurodeputetit Eduard Kukan që të raportojë për misionin në Maqedoni.
“Vizita ndodhi në mes të një krize politike në Shqipëri, kur opozita hoqi dorë nga mandatet parlamentare dhe organizoi protesta masive, të cilat më tej u bënë të dhunshme. Në Maqedoni, vizita u krye në vijim tê marrëveshjes së Prespës dhe para zhvillimit të fushatës presidenciale. Dua të falenderoj ambasadorët Samuel Sbogar dhe Luigi Soreca. Kisha parashikuar t’i jepja fjalën zotit Tun Kellam për të raportuar për misionin në Shqipëri, por ai nuk është prezent në sallë. A ka ndonjë koleg tjetër në sallë që do të marrë fjalën?”, është shprehur David McAllister.
Menjëherë është përgjigjur Eduard Kukan, i cili ka folur rreth situatës politike në Maqedoninë e Veriut. “Ne ishim të inkurajaur nga takimet tona, kryesisht me liderin e opozitës, Mickoski, pasi ai po takohet me kryeministrin Zaev dhe kjo është një provë që dialogu politik në nivel të lartë po vazhdon. Opozita ka pranuar të marrë pjesë në punimet e parlamenrtit të Maqedonisë. Ata kanë ndërtuar dy grupe pune për pjesëmarrjen e plotë të opozitës në punime. Edhe pse opozita ka rezervat e saj për marrëveshjen e Prespës, të dyja palët po përqendrohen tashmë te zgjedhjet presidenciale. Të gjithë janë dakord që zgjedhjet duhet të jenë të lira, të ndershme dhe transparente, në mënyrë që progresi i mirë i bërë nga vendi të forcohet”, ka thënë Kukan duke shtuar se Maqedonisë së Veriut i duhet dhënë një datë lidhur me hapjen e negociatave për anëtarësimin në Bashkimin Europian./Opinion.al
