Në një dalje për mediat në përfundim të mbledhjes se Grupit Parlamentar, kreu i grupit Parlamentar të Partisë Demokratike, Gazment Bardhi, është pyetur nga gazetarët për mungesën e tij në protestën e mbajtur nga ish-kryeministri Sali Berisha ditën e djeshme para Kryesisë së kuvendit.
Bardhi tha se pavarësisht mungesës së tij, ai mbështet dhe do vijojë të mbështesë çdo tubim kundër regjimit të Edi Ramës.
“Unë, Berisha dhe çdo deputet opozitar jo vetëm të duhet të bashkëpunojmë, por të jemi bashkë kundër regjimit të Edi Ramës. Çdo protestë ka patur dhe do të ketë mbështetjen time”-tha Bardhi.
I pyetur nëse ka një dakordësi për protestën e paralajmëruar të enjten para Kuvendit, Bardhi u shpreh se aksioni i deputetëve duhet të vazhdojë.
“Çdo deputet i opozitës ka mbështetur dhe mbështet çdo protestë kundër regjimit të Edi Ramës.
Ne kemi një aksion prej tre muajsh dhe detyra e çdo deputeti është të vijojë aksionin brenda sallës”-tha Bardhi.
