Shqipëria renditet përkrah vendeve të botës së tretë sa i përket punësimit nën standard. Konkretisht, referuar punësimit të përkohshëm të punonjësve sipas gjinisë në sektorin e shërbimeve, Shqipëria zë vendin e 13, pas shteteve si Bangladeshi, Afganistani, Nepali, Mongolia, Ruanda etj.
Në këto vende, si edhe në Shqipëri, përqindja e punëtorëve të përkohshëm femra mund të jetë mbi katër herë më e lartë se pjesa e punëtorëve të përkohshëm meshkuj. Kjo ka të bëjë me politikën që ndjek shteti në raportin midis femrave dhe meshkujve në punësim.
Shifrat janë bërë publike nga Organizata Ndërkombëtare e Punës(ILO) në studimin e bërë së fundmi për punësimi nën standard në të gjithë botën, raporton tv Scan.
Nga ana tjetër, Shqipëria në krahasim me shtetet europiane, radhitet ndër vendet që ka përqindjen më të vogël të punonjësve që punojnë më pak se 35 orë në javë.
Në vendin e parë në këtë drejtim qendron Holanda, ku rreth 45 për qind e punonjësve, shpenzojnë në ambientet e punës më pak se 35 orë në javë. Ndërsa Shqipëria radhitet ndër vendet e fundit të listës, ku vetëm 10 për qind e punonjësve në total e kanë këtë mundësi.
Por në kushtet që ndodhet vendi, orët e pakta të punës do të konsideroheshin luks, pasi pjesa më e madhe e bizneseve jo vetëm që i mbajnë përtej orarit punonjësit, por nuk u sigurojnë as të drejtat më minimale që garantohen nga Kodi i Punës.
