Jose Mourinho në Londër, por jo për finalen e Kupës së Anglisë! Trajneri portugez nuk ka qenë në “Wembley” për të parë ndeshjen e boksit në “O2 Arena”, ku do të ndeshet David Haye, tifoz i Chelsea. Megjithatë, sipas “BBC” në kryeqytetin anglez është arritur marrëveshje përfundimtare dhe më 1 qershor portugezi do të prezantohet si trajneri i ri i Manchester United, paçka se “djajtë” e mbyllën sezonin duke fituar Kupën e Anglisë dhe Louis Van Gaal ka një kontratë deri në vitin 2017.
Van Gaal largohet pas dy sezonesh ku shpenzoi 300 milionë euro, por e lë skuadrën jashtë Champions League, teksa 53-vjeçari Jose Mourinho ka qenë pa punë që nga fillimi i dhjetorit kur u shkarkua nga Chelsea. Ajo që shkruhej prej muajsh në shtypin anglez do të zyrtarizohet pas pak ditësh, sipas “BBC” dhe medieve më të rëndësishme në Britaninë e Madhe që nxituan të publikonin lajmin e arritjes së marrëveshjes me portugezit dhe Manchester United.
Manchester United ka fituar Kupën e Anglisë, për herë të 12-të në historinë e tij, duke barazuar rekordin e Arsenal dhe duke ndalur një “agjërim” prej tre vitesh pa trofe, pasi mposhti 21, Crystal Palace, pas kohës shtesë. Jesse Lingard shënoi golin vendimtar për “djajtë” e Van Gal, dhjetë minuta para fundit të shtesës së dytë, vetëm pesë minuta pasi United kishte mbetur me dhjetë futbollistë, pas kartonit të dytë të verdhë të marrë nga Chris Smalling.
