Mourinho rrezikon të paguajë edhe një herë me çmim të shtrenjtë, disa deklarata të bëra prej tij. Këtë herë, trajneri portugez përfundoi në qendër të vëmendjes për disa deklarata të bëra mbi Anthony Taylor, gjyqtari që do të drejtojë ndeshjen kundër Liverpool. “Dikush ka dashur të bëj presion ndaj gjyqtarit dhe vështirë se ai do të jetë i qetë në gjykimin e tij, por nuk dua t’i hedh benzinë zjarrit,”- kishte deklaruar trajneri i “djajve”, fjalë të cilat do të hetohen nga Federata Angleze e Futbollit dhe Mourinho rrezikon të skualifikohet nëse deklarata nuk është e vërtetë.
Gjyqtari i caktuar për debin e Anglisë, Liverpool-United ka ngjallur shumë diskutime edhe në rrjetet sociale. Gjyqtari Anthony Taylor e ka shtëpinë vetëm 6 kilometra larg qytetit të Manchester dhe tifozët e Liverpool druhen se ai mund të favorizojë United. Trajneri i Manchester United, Jose Mourinho, në vend që të qetësojë gjakrat, kërkon si gjithmonë të shtojë presionin mbi “xhaketat e zeza”. FA ka deklaruar se do të hetojë fjalët e trajnerit dhe do të marrë një vendim në lidhje me thëniet e tij.
