Ajo që do të zhvillohet të shtunën në “Old Trafford” mes Manchester United dhe Manchester City-it pritet të jetë një sfidë epike. Do të jetë përballja e parë në Premier League mes Jose Mourinho dhe Pep Guardiola, protagonistët absolut të derbit të Mançesterit. Thumbimet ndaj njëri-tjetrit nuk kanë munguar, por këtë vit ka qenë “Special One” ai që ka bërë thirrje për qetësi: “Nëse përqendrohemi vetëm te ne të dy rrezikojmë të harrojmë objektivin e vërtetë”.
Megjithatë, kompanitë angleze të basteve kanë dashur t’i fryjnë edhe një herë zjarrit të rivalitetit mes dy trajnerëve, duke i ofruar tifozëve një bast special për derbin: nuk do të ketë shtrëngim duarsh mes të dyve në fund të ndeshjes. Një mundësi kjo që ofrohet me koeficientin 6 dhe që konsiderohet më e mundshme se përjashtimi nga ndeshja i njërit prej trajnerëve. Mes të dyve, gjithsesi, ai që ka më shumë mundësi të humbasë durimin është Mourinho, që ka koeficientin 26,00 për një të kuq, kundër koeficientit 34,00 të vendosur për Guardiola-n.
