Jose Murinho ka treguar fytyrën e vet më miqësore dhe mbështetëse të hënën në mbrëmje, me rastin e darkës vjetore të Manchester United, për të ndihmuar më të pafavorizuarit. Ngjarja e UNICEF kishte për qëllim të mblidhte para për t’ua dhuruar fëmijëve me pak burime jetësore në Tajlandë dhe rezultati ishte një sukses.
240 mijë euro janë mbledhur te “Djajtë e Kuq”, ndërsa Mourinho ka qenë pjesë aktive e këtij procesi. Trajneri portugez nxori në ankand xhupin e tij dhe shallin, me të cilët u paraqit ditën e prezantimit në “Old Trafford”, shkruan Telsport.
Por të pranishmit ishin të impresionuar me Mourinhon në momentet e fundit të eventit humanitar, kur ai hoqi orën e tij me vlerë prej 18 mijë eurosh dhe vendosi ta dhurojë atë si sendin përfundimtar. Artikujt në ankand të Mourinhos kanë injektuar rreth 35 mijë euro në total.
“Dashuria është një nga gjërat e mrekullueshme në lidhje me këtë klub. Kështu ka qenë gjithmonë, ne mbetemi përkrahës të UNICEF-it. Përmes kësaj organizate humanitare e dimë se paratë shkojnë në vendin e duhur. Këto para të mbledhura sonte do të shkojnë në Tajlandë, për të ndihmuar njerëzit në nevojë atje, për të ndërtuar një të ardhme më të mirë “, ka thënë trajneri i Manchester United. /Insajderi.com
