Për herë të parë tek ‘Ka një mesazh për ty’ refuzohet ftesa në studio, duke e lënë kështu një motër pa falje nga vëllai i saj. Bëhet fjalë për një grua nga Korça, e cila ishte kthyer tek bashkëshorti i saj i parë, pasi ishte larguar një herë prej tij për shkak të keqtrajtimeve dhe xhelozisë.
Ndonëse kishte nisur të jetonte me një burrë tjetër, i cili e trajtonte shumë mirë dhe kujdesej edhe për 2 vajzat e saj nga martesa me burrin e parë, nuk kishte arritur të shkëputej nga dashuria. Ajo kishte ikur nga familja kur ishte 17 vjeç për të jetuar me të; për këtë arsye prindërit dhe vëllai nuk e afronin, pavarësisht përpjekieve të shumta. Kështu, zonja nga Korça iu drejtua ‘Të Dielës Shqiptare’ për të kërkuar faljen nga vëllai, me të cilin kishte 8 vjet që nuk komunikonte.
Marrëdhëniet ishin përkeqësuar më shumë pasi ajo ishte larguar nga partneri i 2-të të cilin siç rrëfeu ajo, nuk arriti ta dashuronte ndonëse sillej jashtëzakonisht mirë me të. Ishte treguar aq i kuptueshëm, sa kur ajo kishte ndier nevojën për t’u takuar sërish me bashkëshortin e parë, ai e kishte ndihmuar duke u kujdesur për fëmijët e më pas, e kishte mirëkuptuar vendimin e saj për t’u kthyer me babain e 2 vajzave. Ndërkohë, bashkëshorti i saj i parë bashkëjetonte me një grua tjetër
Zonja nga Korça rrëfeu se pavarësisht gjithçkaje që kishte ndodhur gjatë kohës që ishin të ndarë, ajo dhe burri i saj i parë morën vendimin të ktheheshin përsëri bashkë, dhe u bënë prindër për herë të tretë. ‘Në fillim ai ishte xheloz, si më parë, por më pas me kalimin e kohës ndryshoi’, i tha ajo Ardit Gjebresë, ‘Tani sillet shumë mirë, nuk është më xheloz’.
Megjithatë, vëllai i saj nuk e pranoi ftesën e ‘Ka një mesazh për ty’ për të qenë në studio, ku e motra do t’i kërkonte falje. E trishtuar, ajo tha se ‘E di që jam fajtore, por shpresoj të më falë një ditë’. Fundja, ‘gjaku nuk bëhet ujë’! / Anabel
