Ministrja e Infrastrukturës dhe Energjisë, Belinda Balluku thotë në terren ndodhen të gjitha strukturat për të vepruar në kohë ndaj çdo problematike që mund të shfaqet për shkak të motit të keq.
Nëprmjet një postimi në rrjetet sociale, Balluku shkruan se janë 18 fidera të energjisë elektrike jashtë funksionit, ku momentalisht problem paraqitet zona e Kavajës.
Brigadat e Tensionit të Lartë kanë ndërhyrë në 15 linja 35kV dhe nënstacione, duke rikthyer energjinë në zona ku u shfaqën problematika.
Linjat e Hidrovorëve dhe institucioneve të rëndësisë së veçantë janë në funksion të plotë. Në linjat e transmetimit të energjisë dhe nënstacionet e OST situata paraqitet e qetë dhe pa problematika.
Si pasojë e reshjeve ka pasur rritje të prurjeve në kaskadën e Drinit, ndërsa janë marrë masat për të mos pasur shkarkime. Situata në tre hidrocentralet paraqitet:
Fierzë: Niveli 266.43 m; Prurjet 200 m3/s
Koman: Niveli 172.55 m; Prurjet 240 m3/s
Vau Dejës: Niveli 74.40 m; Prurjet 30 m3/s
Ndërkohë, në të gjitha akset rrugore të vendit qarkullimi kryhet normalisht, pavarësisht reshjeve të shiut që po vijojnë. Në terren ndodhen të gjitha grupet e punës duke bërë pastrimin e akseve nga rënia e gurëve apo inerteve.
Në qarkun e Fierit, përkatësisht në stacionin e Kutës është shfaqur problem me elektromotorët e pompave të ujit ku autoritet po punojnë për riparimin e tyre. Në qarqet e tjera situata e furnizimit me ujë, si dhe impiantet e përpunimit të ujërave të ndotura, janë në kushte optimale.
Në portin e Durrësit situata paraqitet normale në të 3 terminalet. Nuk parashikohen vonesa për tragetet në nisje. Në portin e Vlorës situata paraqitet e qetë. Nuk ka kufizime dhe pezullim të anijeve të peshkimit dhe mjeteve të vogla lundruese, ndërkohë që anijet e transportit ndërkombëtar detar po vijojnë të operojnë normalisht.
Në aeroportin ndërkombëtar “Nënë Tereza” dhe aeroportin ndërkombëtar të Kukësit, situata paraqitet e qetë dhe pa problematika.
