Moti i keq ka shkaktuar probleme të mëdha në Qarkun e Shkodrës, ku shumë zona kanë mbetur pa energji elektrike, ndërsa disa akse rrugore janë bllokuar ose kanë prani uji apo rënie gurësh.
“Raport mbi situatën në territorin e Qarkut Shkodër, ora 17:00
Nga DRV Shkodër: Informohemi se akset rrugore të mbuluara nga kjo drejtori janë të qarkullueshme.
Nga Bashkia Shkodër:Vijon e njëjta situatë në aksin rrugor Prekal-Kir, ku për arsye sigurie nuk mund të ndërhyhet.
Në segmentin rrugor Breg Lumi-Theth po punohet për hapjen nga firma kontraktore, ndërsa ndihmojnë edhe banorë të komunitetit të zonës.
Në Bashkinë Malësi e Madhe:Vijojnë reshjet e shiut me intensitet të lartë dhe erë me shpejtësi të madhe.
Mungon energjia elektrike në të gjitha njësitë administrative: Gruemirë, Shkrel dhe Kelmend.
Nuk raportohen rrugë të bllokuara.
Në Bashkinë Vau-Dejës: Reshjet e shiut vijojnë me intensitet mesatar, shoqëruar me erë të fortë.
Mungon energjia elektrike në të gjithë njësinë administrative.
Në Bashkinë Fushë-Arrëz: Reshjet e shiut dhe era me intensitet të lartë vazhdojnë.
Ka ndërprerje të energjisë elektrike në njësitë administrative Iballe, Fierzë dhe Blerim.
Qarkullimi në rrugët kryesore vijon, por ka prezencë uji dhe gurësh.
Aksi rrugor Gjegjan-Shpal është i bllokuar në rreth 40%.
Në Bashkinë Pukë: Reshjet intensive të shiut vazhdojnë.
Raportohen bllokime të rrugëve rurale në njësitë administrative.
Në Qerret raportohet dëmtimi i çatisë së një banese, ndërsa energjia elektrike është ndërprerë që në orën 13:00.
Nga OSHEE Shkodër: Informohemi se po punohet në nënstacionin e Çasit për të vënë në punë hidrovorin. Gjithashtu, grupet në terren po punojnë për rikthimin e energjisë elektrike”, njoftojnë Emergjencat.
