Orët e fundit rajoni ynë është përfshirë nga moti i acartë me reshje të dendura dëbore dhe temperatura të ulëta. Era e stuhishme dhe dëbora në Bosnje-Hercegovinë, Kroaci dhe Serbi kanë shkaktuar vështirësi në qarkullimin e mjeteve. Dhjetëra mijëra shtëpi në Bosnje-Hercegovinë ishin pa energji elektrike për shkak të reshjeve të dendura të dëborës dhe erërave të forta që nxitën gjithashtu kaos në trafik, në Kroaci dhe Serbi.
Në të gjithë Ballkanin autoritetet lëshuan paralajmërime mbi rrezikun që paraqesin rrugët për shkak të rrëshqitjeve të borës. Disa rrugë kryesore u mbyllën, përfshirë pjesë të disa autostradave në Kroaci. Bosnja, Serbia dhe Kroacia ndaluan lëvizjen e automjeteve të rënda dhe vendosën kufizime në qarkullim në rrugët e prekura nga stuhitë.
Pjesë të Bosnjës u përballën me një ndalim total të trafikut hekurudhor. Kompania shtetërore e energjisë në Bosnje tha se situata ishte “jashtëzakonisht e vështirë” në disa zona të vendit. Pesha e dëborës së madhe u bë shkak për rrëzimin e disa linjave elektrike. Probleme të mëdha trafiku u shkaktuan në të gjithë Kroacinë. Disa rrugë u mbyllën për shkak të rrëshqitjeve të dheut dhe reshjeve të dëborës, ndërsa në disa pjesë u ndalua qarkullimi i mallrave.
Në disa zona të Bosnje-Hercegovinës pothuajse 200 mijë familje janë pa energji elektrike. Mësimi në shkolla është shtyrë në disa qytete ndërsa bora vijon të pengojë funksionimin e trafikut në të gjithë vendin. Zyrtarët u bëjnë thirrje drejtuesve të mjeteve që të përshtatin drejtimin e tyre me kushtet e rrugës dhe të përdorin pajisjet dimërore, duke përfshirë zinxhirët në seksione të vështira.
Parashikimet meteorologjike paralajmërojnë vazhdimin e reshjeve të dëborës, kështu që situata në rrugë mund të përkeqësohet edhe më tej. Për shkak të stuhisë së dëborës, trafiku është ndërprerë plotësisht midis katër komunave në Bosnjën jugperëndimore, si dhe pikës kufitare me Kroacinë në Izaçiç.
Në vendkalimet kufitare me Kroacinë në Velika Kladusha dhe Gradina, në hyrje të Bosnje-Hercegovinës u krijuan vargje të gjata automjetesh ku ishte e pranishme era e stuhishme dhe dëbora e dendur. Pas Srebrenikut, Graçanicës në komunën e Teoçakut është shpallur gjendje e fatkeqësisë natyrore. Lidhjet telefonike janë bllokuar në Graçanicë dhe kryetarëve të komuniteteve lokale u janë caktuar radio pajisje për të siguruar komunikim të vazhdueshëm.
Për shkak të peshës së dëborës në pjesë të shumta, pemët shpesh rrëzohen në rrugë. Janë pezulluar edhe disa linja tragetesh në bregdetin kroat.
Gjatë natës dëbora ka mbuluar një pjesë të madhe të Serbisë dhe ka shkaktuar probleme të mëdha në disa komuna, ku trafiku është i bllokuar, ndërsa ekipet e shërbimit dimëror po punojnë vazhdimisht për pastrimin e rrugëve. Në perëndim të vendit është shpallur alarm i kuq, ndërsa reshjet më intensive të borës priten në rajonet në afërsi të Beogradit.
Cikloni që po lëviz gradualisht mbi Gadishullin Ballkanik po sjell reshje afatgjata dhe fluksi shtesë i ajrit të ftohtë po sjell rënie të mëtejshme të temperaturave.
Klan News
