Zgjedhja e Donald Trump si president i Shteteve të Bashkuara të Amerikës me gjasë ka parandaluar Luftën e Tretë Botërore dhe ka shmangur fundin e botës.
Deklarata e fortë vjen nga Sergei Glazyev, një prej këshilltarëve më të ngushtë të presidentit rus Vladimir Putin.
Sipas tij amerikanët kishin dy zgjedhje më 8 nëntor, Luftën e Tretë Botërore dhe paqen ndërkombëtare.
Zyrtari i lartë i Kremlinit shkoi edhe më tej me deklaratat e tij, duke e cilësuar kandidaten humbëse, Hillary Clinton, si një simbol të luftës, ndërsa për presidentin e zgjedhur Trump, tha se ka një shans për të ndryshuar rrjedhën e marrëdhënieve.
Fitorja e Donald Trump-it në zgjedhjet presidenciale u prit pozitivisht nga Kremlini, nisur edhe nga deklaratat gjatë fushatës së shefit të ri të Shtëpisë së Bardhë, për dialog me Rusinë.
Uashingtoni dhe Moska kanë pasur marrëdhënie të ftohta gjatë administratës Obama, por presidenti Putin në një dalje publike të mërkurën tha mirëpret deklaratat e Trump-it dhe se Rusia është e gatshme të bëjë hapin e saj përpara në përmirësim të marrëdhënieve./tvklan
