Regjisori i njohur Edmond Budina, një nga aktivistët kryesorë të Aleancës për Mbrojtjen e Teatit, i bëri thirrje shqiptarëve për mosbindje civile.
Budina tha se megjithëse godina u shemb, aleanca nuk ka vdekur. Ai e konsideroi krim kundër njerëzimit ndërhyrjen e policisë pasi sipas tij shembja e godinës kishte nisur kur brenda kishte akoma njerëz.
Regjisori i kërkoi Presidentit të Republikës të shpërndajë parlamentin dhe paralajmëroi vijimin e protestës duke shtuar se “partitë politike në daçin t’i bashkohen lëvizjes së qytetarëve, në të kundërt në djallë të venë”
“Ju kërkoj ndjesë që teatri jonë u shemb, por teatri jeton. Ata sot bënë një akt kriminal. Aleanca për Teatrin nuk ka vdekur. Kriminelët deshën të vrisnin shokët tanë kur ishin brenda. Ky është një krim kundër njerëzimit, jo një krim në tentativë por një krim.
Ne i kërkojmë qytetarëve të Shqipërisë të bëjmë një mosbindje civile. Të thyejmë karantinën derisa të shporrim mafiozët. I kërkojmë Presidentit të shpërndajë Parlamentin ilegjitim. Ky është një Parlament ilegjitim.
Ne jemi kthyer në diktaturë. Ky ishte akti i fundit. Këtu u varros demokracia. Të vazhdojmë në protestë deri në rrëzimin e kësaj qeverie të jashtëligjshme. Partitë politike në daçin t’i bashkohen lëvizjes së qytetarëve, në të kundërt në djallë të venë. Të vazhdojmë protestat deri në rrëzimin e qeverisë.” – tha Budina. /Opinion.al
