Irani ka bërë një kërcënim të drejtpërdrejtë për Izraelin në rast se ky i fundit planifikon të kryej sulme. Është komandanti i Gardës Revolucionare të Iranit i cili e bën një paralajmërim të tillë. Frika për një konflikt më të gjerë në Lindjen e Mesme është rritur ndërsa Izraeli planifikon përgjigjen e tij ndaj sulmit me raketa të 1 tetorit të kryer nga Irani pas sulmeve ajrore izraelite ndaj militantëve aleatë të Iranit.
“Ne ju themi juve se nëse kryeni ndonjë agresion kundër ndonjë pike, ne do të sulmojmë me dhimbje të njëjtën pikë tuajën. Irani mund të depërtojë në mbrojtjen e Izraelit”, tha Hossein Salami, Komandant i Gardës Revolucionare të Iranit.
Sekretari amerikani Mbrojtjes, Lloyd Austin, foli me ministrin izraelit të Mbrojtjes Yoav Gallant në lidhje me operacionet e Izraelit në Liban dhe Gaza, që synojnë të shmangin një luftë rajonale. Ministri i Jashtëm i Iranit, Abbas Araqchi, zbarkoi në Kajro për bisedime me zyrtarët egjiptianë, si pjesë e një turneu në Lindjen e Mesme, ndërsa tensionet po rriten. Izraeli nuk tregon shenja të lehtësimit të fushatave të tij ushtarake kundër Hezbollahut në Liban, pasi vrau disa prej liderëve të tij dhe Hamasit në Gaza dhe është zotuar të ndëshkojë Iranin për sulmin e tij të 1 tetorit.
Ndërkohë bëhet e ditur se sulmet ajrore izraelite vranë 11 palestinezë në qytetin e Gazës, thanë mjekët, ndërsa forcat izraelite dërguan tanke në Jabalia në veri, ku palestinezët dhe zyrtarët e Kombeve të Bashkuara shprehën alarmin për mungesën e ushqimit dhe ilaçeve. Banorët e Jabalia thanë se forcat izraelite hodhën në erë grupe shtëpish nga ajri, me predha tankesh dhe duke vendosur bomba në ndërtesa përpara se t’i hidhnin në erë nga distanca. Ushtria izraelite tha të enjten se gjatë 24 orëve të fundit kishte vrarë 45 luftëtarë të Hezbollahut në Libanin jugor, duke përfshirë një komandant batalioni dhe sekuestroi shumë armë.
