Cigarja e parë nuk është edhe aq e pafajshme sa duket. Në fakt sipas shkencëtarëve ka rezultuar se 70% e personave që provojnë një cigare për herë të parë, fillojnë ta tymosin rregullisht atë.
Profesori Peter Hajek nga Universiteti ‘Queen Mary’, Londër, thotë se kjo është hera e parë që tregon varësinë të cilën mund ta krijojë konsumimi i vetëm një cigareje.
“Në zhvillimin e çfarëdo varësie, kalimi nga eksperimentimi në përdorim të rregullt është gjë e rëndësishme, sepse tregon që një aktivitet rekreacional po shndërrohet në një nevojë.
Ne kemi zbuluar se përqindja e atyre që e provojnë duhanin dhe shndërrohen në konsumues të rregullt të duhanit është shumë e lartë, dhe kjo ndihmon në konfirmimin e rëndësisë që ka parandalimi i eksperimentimit me cigare”, shprehet ai.
Vitin e kaluar, një studim i përmasave të mëdha nga shkencëtarë kanadezë – me rreth 44,000 persona të moshave 14 deri 18 vjeç – kishte zbuluar se ata të cilët përdorin cigare elektronike janë thuajse dyfish më të prirur të bëhen konsumues të rregullt të duhanit.
