Procesi i zhdoganimit të mallrave në kufi me Kosovën është kthyer në tmerrin e kamionistëve, por jo vetem, të gjithë atyre që kanë marrëdhënie tregtare mes dy shteteve shqiptare.
Radhë të gjata prej mbi 2 km u krijuan edhe të mërkurën nga kamionët e tonazhit të rëndë, që transportojnë mallra nga Shqipëria në Kosovë.
“Vetëm një sportel punon. Kurrë nuk bëhen dy bashkë. Shumë ngadalë punohet. Është humbje kohe për ne dhe harxhim nafte”, thonë drejtuesit e kamionëve.
Drejtuesit e kamionëve fajësojnë palën kosovare për vonesat.
Humbja e kohës në kufi për bizneset është dhe humbje financiare dhe drejtuesit ankohen kur dëgjojnë se procedurat janë lehtësuar, ndërsa në terren përballen me një situatë tjetër.
Kjo nuk është hera e parë që bëhen radhë të gjatë në doganën e Morinës. Jo vetëm që nuk bëhet fjalë për lehtësira doganore mes dy shteteve shqiptare, por për pengesa nga më të ndryshmet që rrezikojnë punën e dhjetëra bizneseve.
