Në 30 Janar të këtij viti “Stop” transmetoi problemin e zotit Bilbil Cjapi, i cili kishte punuar në kompaninë Albpetrol dhe në 2014-ën ishte pushuar nga puna padrejtësisht.
Për këtë arsye ai hapi proces gjyqësor, i përfaqësuar nga avokati Ilir Hasa. Në 2017-ën, Gjykata e Shkallës së Parë në Fier vendosi, që Bilbil Cjapi të dëmshpërblehej me shumën 113 milionë Lekë të vjetra.
Sipas bashkëshortes së Bilbilit, avokati nuk kishte depozituar gjysmën e parave, ashtu edhe siç ishte firmosur akt-marrëveshja. Vëllai i Bilbilit shkoi tek avokati dhe mori 5 milionë Lekë në emër të të vëllait, të cilit nuk ia dha kurrë.
Gramoz Cjapi, vëllai i Bilbilit, është drejtor në Drejtorinë Vendore të Policisë Berat dhe në një audio regjistrim u dëgjua pohimi i avokatit, që tregon, sesi Gramozi, ia mori paratë.
Pas këtij transmetimi, Prokuroria pranë Rrethit Gjyqësor Fier ka regjistruar kallëzimin për veprat “Mashtrim dhe shpërdorim detyre”./ Tv Klan
