TIRANË- Me hyrjen në fuqi të Moratoriumit 10 vjeçar për Pyjet, duket se sharrat nuk kanë ndalur së preri drurë në pyje. Inspektoriati i Mjedisit thotë se gjatë kontrolleve janë konstatuar 9 shkelje dhe janë vendosur 9 masa administrative me 50 milionë lekë secila gjobë. Në total shuma e gjobave është 450 milionë lekë.
Rastet janë konstatuar në qarqet: Fier, Elbasan, Lezhë, Tiranë, Korçë dhe Shkodër. Sipas njoftimit zyrtar të Inspektoriatit Shtetëror të Mjedisit dhe Pyjeve janë sekuestruar 59 m3 lëndë drusore.
Por sakaq, inspektoriati njofton se janë kryer inspektime edhe për gjuetinë e paligjshme. Përgjatë muajit shkurt janë kryer rreth 750 inspektime, nga të cilat për mbrojtjen e gjuetisë 150 të tilla.
“4 persona janë kallzuar në porkurori si dhe janë vendosur gjithsej 52 masa administrative, dënim me gjobë në vlerën 482 milionë lekë të vjetra dhe me vlerë dëmi 1,5 milionë lekë”, thuhet më tej në njoftimin e ISHMP-së.
Përveç gjobave në pyje, janë sekuestruar armë gjahu, duke ndëshkuar autorët për gjuetinë e paligjshme, bimët mjekësore e prodhimet e dyta pyjore.
Kryeinspektori, Ergys Agasi apelon qytetarët, median dhe opinionin publik, që të jenë pjesë e denoncimit të rasteve të shkeljes së moratoriumit.
Për këtë është krijuar aplikacioni i ri “Mjedisi IM” që është i aksesueshëm në çdo telefon android apo iphone për të denoncuar në kohë reale cdo shkeljet në pyje, mjedis, etj.
/Opinion.al
