Kryetarja e Lëvizjes Socialiste për Integrim Monika Kryemadhi ka dënuar fort vrasjen e gjyqtares së Shkodrës Fildes Kasemi 39 vjeç, që u ekzekutua sot nga ish-bashkëshorti.
Në një postim në Facebook, Kryemadhi ngre akuza mbi të gjithë sistemin e drejtësisë duke thënë se kjo ngjarje ishte paralajmëruar disa herë, pasi bashkëshorti kishte tentuar edhe më parë ta vriste.
Sipas kryetares së LSI, “qarravitjet në rrjetet sociale dhe emisione nuk i japin zgjidhje kësaj situate”, por duhet ndryshim rrënjësor.
Statusi në Facebook i Monika Kryemadhit:
“Vrasja e paralajmëruar e një nëne, gruaje për më tepër gjyqtare është akti më i rëndë dhe katastrofik që mund t’i ndodhë një vendi që pretendon të jetë anëtar i BE. Me revoltën e një nëne, me forcën e një gruaje që ka përballuar shumë vështirësi në jetë dhe me kurajon e përfaqësimit të një force politike si LSI, sot ngre zërin tim fuqishëm kundër këtij sistemi që ende dhunon gratë e pafajshme. Të gjithë ne mbajmë përgjegjësitë tona për këtë situatë të rëndë, por më shumë duhet të ndihen përgjegjës ata që e lanë nënën e dy fëmijëve në dorën e një vrasësi që disa herë e kishte paralajmëruar aktin e tij të burracakërisë. Policia, gjykata, shoqatat për mbrojtjen e të drejtave të grave, politika dhe e gjithë shoqëria shqiptare duhet të reagojë me forcë dhe efikasitet. Qarravitjet në rrjetet sociale apo emisione televizive nuk mund ta zgjidhin kurrë këtë situatë të rënduar të krimit në familje. Duhet që çdo gjë të nisë nga vetë ne.
