Kryetari i Bashkisë Erion Veliaj prej disa ditësh po bën fushatën e tij në Tiranë për PS nën moton “Tirana 2 vjet zgjuar”. Teksa flet për investimet e bashkisë ai nuk ngurron të kërkojë edhe votat për Edin dhe lali Erin siç e quan veten.
Por sot u përball me një moment të pakëndshëm gjatë takimit me banorë të njësisë nr.4. Dy djem minoren, ngritën një bluzë me mbishkrimin “Republika e Re” teksa fliste Veliaj.
Ai nuk e lë këtë moment pa e komentuar dhe sulmon ashpër Bashën dhe kandidatin për deputet të zonës, Gent Strazimiri.
Veliaj: “Shoh një çun të vogël aty me bluzën “Republika e re”, Lulit bluzat dhe lekët merrjani se të popullit janë, por votën PS-së, lali Erit dhe Edit. Se me lekët e popullit i kanë bërë nuk i kanë bërë me lekët e Holandës. Meqë mu kujtua kjo “Republika e re” po u them edhe fëmijëve se Republika e re i ka sjellë deputet kësaj zone, atë Strazimirin që shkoi me pistoletë të prishte parkun, këndin e lodrave. Republika e re i propozon njësisë 4 t’ju sjellë terminatorin e kalamajëve. Pra njeriun që prish lodrat e kalamajve. Unë jam kurioz, si do vijë ai te lagjja juaj dhe si do justifikojë faktin që ka bërë hajvanllikun më të madh në jetë, të shkojë me pistoletë të prishë këndin e lodrave. Ky lloj hajvani për ca i duhet njësisë 4. Kush është ai demokrat që zgjedh Strazimirin para kalamajve të vet, vetëm të jesh i luajtur mendsh”.
