Policia e Tiranës ka ndaluar paraditen e sotme dy persona, të cilët ishin shpallur në kërkim që pas akteve të dhunshme në protestën para Bashkisë Tiranë në datën 19 prill.
Sipas forcave blu, dy të arrestuarit janë Lulzim Nela dhe Ahmet Maja.
Gjithashtu policia shprehet se dyshohet që këta dy shtetas kanë ushtruar akte të dhunshme, kanë kundërshtuar me forcë punonjësit e policisë dhe kanë hedhur lëndë piroteknike e molotovë në drejtim të punonjësve të policisë dhe të Bashkisë së Tiranës.
Njoftimi i policisë:
Tiranë
Drejtoria Vendore e Policisë Tiranë, sot më datë 26.04.2024, në orën 08:00, në lidhje me aktet e dhunshme të ushtruara gjatë protestave të datave 11.04.2024 dhe 19.04.2024, përpara Bashkisë Tiranë, nga Aleanca për Mbrojtjen e Teatrit, në vijim të veprimeve hetimore e procedurale dhe nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, ndaloi shtetasit:
– A. M., 36 vjeç, dhe L. N., 40 vjeç, të dy banues në Borizanë, Krujë, për veprat penale “Goditjet për shkak të detyrës”, “Prishja e qetësisë publike”, “Shkelja e rregullave mbi lëndët plasëse dhe djegëse”, dhe “Shkatërrimi i pronës me zjarr”, kryer në bashkëpunim.
Nga veprimet hetimore të kryera dyshohet se këta shtetas, gjatë protestave të zhvilluara më datë 11.04.2024 dhe 19.04.2024, kanë ushtruar akte të dhunshme, kanë kundërshtuar me forcë punonjësit e policisë, kanë hedhur lëndë piroteknike e molotov në drejtim të punonjësve të policisë dhe të Bashkisë së Tiranës.
Materialet i kaluan Prokurorisë.
