Pronari i lokalit “My House”, i cili paraditen e djeshme gjeti në oborrin e biznesit të tij një bombë artizanale të pashpërthyer ka mohuar borxhin 300 mijë euro, që ai i kishte dhënë ish-pronarit të lokalit në këmbim të marrjes së objektit.
“Panorama” shkruan sot se Mustaf Deda, nuk pranoi dje të jepte komente rreth ngjarjes, duke u shprehur se nuk kishte probleme me asnjë person. Nga ana tjetër, i pyetur rreth mënyrës së përfitimit të lokalit, si këmbim për huan 300 mijë euro që i kishte dhënë ish-pronarit Kadri Çuka, ai e ka mohuar këtë borxh, edhe pse Policia e tha dje edhe zyrtarisht. “Nuk e di çfarë thotë Policia. Nuk e di ku i gjen këto”, u shpreh ai duke u larguar pa pranuar të japë më shumë shpjegime, shkruan “Panorama”. Ndërsa burimet sqaruan se trualli ku është ndërtuar ky lokal ka qenë vazhdimisht me probleme pronësie.
Disa çështje gjyqësore janë hapur në lidhje me pronësinë e këtij trualli, ku veç lokalit të Dedës, janë ndërtuar edhe biznese të tjera dhe disa pallate. Si pronar i këtij trualli, vite më parë është njohur shtetasi Kadri Çuka, edhe pse ai nuk ka pasur asnjë dokument që të vërtetonte pronësin Megjithatë, në këmbim të shumave të ndryshme parash, që ka marrë nga disa biznesmenë, ai e ka shitur pjesëpjesë truallin, ku janë ndërtuar tashmë dhjetëra godina. Vazhdimisht ka pasur probleme që kanë shkuar në Gjykatë në lidhje me pronësinë e tokës, që ende nuk kanë marrë zgjidhje. Nga ana tjetër Çuka, para disa vitesh, ishte proceduar nga policia edhe për mashtrim, i denoncuar nga një biznesmen. Në kallëzim, biznesmeni pretendonte se i kishte dhënë Çukës 100 milionë lekë, për të marrë sipërfaqen prej 920 metrash katrorë tokë për ndërtim, Hamid Shijaku”, ku ndodhet edhe lokali që u vendos bomba. Etleva Delia/Panorama.al
