Moldavia tha këtë të hënë se raketat ruse që kishin në shënjestër Ukrainën kaluan përmes hapësirës së saj ajrore. Kjo bëri që Moldavia të thërrasë në bisedë të dërguarin e Moskës për t’i kërkuar shpjegime.
“Tre raketat e lëshuara në Ukrainë këtë mëngjes nga Rusia kaluan hapësirën ajrore të Moldavisë”, tha ministri i Jashtëm Nicu Popescu në Twitter.
“E kam udhëzuar ambasadorin e Rusisë që të vijë në bisedime për të dhënë një shpjegim”.
Popesku shprehu zemërim për sulmet e shumta të kryera në qytetet e Ukrainës të hënën, një ditë pasi Moska fajësoi Ukrainën për shpërthimin në urën Kerç që lidh Krimenë me Rusinë.
“Të tmerruar nga sulmet e shumta me raketa ruse në qytete anembanë Ukrainës, përfshirë kryeqytetin Kiev, duke goditur objektiva civilë. Rusia duhet të ndalojë vrasjet”, tha Proseku.
Proseku u shpreh se zyra e tij ka qenë në kontakt me stafin e ambasadës moldave në Kiev dhe tha se ata ishin “të sigurt dhe se po strehohen nga sulmet ndaj civilëve”.
Ashtu si Ukraina, Moldavia është një ish-pjesë e Bashkimit Sovjetik me një qeveri pro-perëndimore.
Qindra mijëra refugjatë ukrainas kanë mbërritur në vend që kur Rusia dërgoi trupa në Ukrainë.
Moldavisë së bashku me Ukrainën iu dha statusi i kandidatit nga Bashkimi Evropian në shenjë mbështetjeje përballë ofensivës së Rusisë.
Kujtojmë se Moldavia ka një rajon të vogël të shkëputur, Transnistria, i cili është i armatosur dhe i mbështetur nga Rusia./Opinion.al
