Nga konferenca për shtyp së bashku me kryeministrin Edi Rama, përfaqësuesja e lartë e politikës së jashtme të Bashkimit Europian, Federica Mogherini i ka dërguar një mesazh opozitës shqiptare, duke thënë se nuk duhet të cenojë proceset demokratike.
Mogherini deklaroi se ky është një qëndrim në bllok i Bashkimit Europian.
“BE e ka përsëritur qëndrimin e vet, partitë politike nuk duhet t’u kthejnë shpinën proceseve demokratike dhe qytetarëve nuk u duhet mohuar e drejta për të votuar. Ky është një mesazh i fortë dhe i bashkuar nga BE, që nga partitë dhe Parlamenti Europian. Edhe një herë, u referohem rezultateve të sondazhit, që 88% e qytetarëve shqiptarë kanë besim në BE dhe 92% e shqiptarëve ndajnë të njëjtin objektiv, anëtarësimin në BE. Kjo i ngarkon me përgjegjësi udhëheqësit politikë, jo vetëm në Shqipëri por edhe në Bashkimin Europian”, u shpreh Mogherini, e cila do të jetë në Tiranë edhe ditën e nesërme në takimin me liderët e Ballkanit./Opinion.al
