Kryetari i Listës Serbe, Goran Rakiç, deklaroi të mërkurën se serbët po presin me interes vizitën e paralajmëruar të presidentit Aleksandër Vuçiç në Kosovë dhe veçanërisht fjalimin e tij.
Rakiç u shpreh për Tanjug se interesimi për këtë vizitë është më i madhi deri më tani, transmeton KosovaPress.
“Qindra qytetarë çdo ditë na kontaktojnë me dëshirën që të dinë për detajet e vizitës dhe me përgjegjësi pohoj kjo do të jetë pritja më e madhe për presidentin e Serbisë që nga viti 1989 në Gazimestan”,- tha Rakiç.
I pyetur se çfarë presin nga vizita e Vuçiçit, ai tha se serbët presin mbështetje dhe inkurajim nga presidenti i tyre, të cilit i kanë dhënë besimin.
“Në zgjedhjet për president, sikurse e dini, mbi 80 për qind e votave mori Vuçiçi dhe për këtë përsëris se ne nuk kemi shtet tjetër përveç Serbisë”, – tha kreu i Listës Serbe.
