Në fshatin Tpla, Tropojë, familja Malaj jeton në skamje. Djali i familjes, Edisoni në moshën 12 vjeçare i lindur me një vrimë në shtyllën kurrizore lufton me vdekjen pasi nuk ka para për operacionin.
__________
Kjo familje prej 5 anëtarësh pa të ardhura ekonomike në një banesë në kushte mesjetare bën apel për ndihmë. Banesa pa tavane me ndarje dhome prej çatmash dhe lageshti, në mungesë të çdo orendie shtëpie me një llampë elektrike, me mungesë të vazhdueshme të ushqimeve apo bukës së gojës na sjell ndër mend legjenden e misrit të Migjenit pa, bukë, pa ngrohje, pa rroba, pa shpresë ky është realiteti i sotëm të familjes Malaj. I zoti i shtëpisë Mus Malaj është martuar në moshë të thyer, sot është 75 vjeç, ka tre femijë dhe një bashkëshorte 30 vite më të re. Por vuajtjet mundimet dhe hallet e kanë plakur para kohe këtë grua.
Por e keqja nuk mbaron me kaq krahas tre djemëve të kësaj familje ndodhet edhe Edisoni 12 vjeç i cili ka lindur me një vrimë afër shtyllës kurrizore dhe jeta e tij është në rrezik në çdo moment.Vetëm ndërhyrja kirurgjikale në spitale jashtë shteti është zgjidhja.
Ky fëmijë 12 vjeçar është i detyruar të mbajë pampers gjatë gjithë kohës. Edisoni është një fëmijë i zgjuar dhe mëson në shkollë e do jetën megjithëse është i sëmurë ai e vazhdon shkollën udhëton dy orë në ditë me çantën e librave në shpinë një rrugë me baltë ujë e dëborë i veshur keq shpesh herë edhe i zbathur në kundërshtim të plotë me këshillat e mjekut por me dëshirën e madhe për tu bërë i ditur.
Nga lodhja, sëmundja pothuajse me orë të tëra rri i lagur nga pantallonat pasi pampersat nuk ja mbajnë urinimin e pavetëdishëm dhe shpesh është përballur edhe me ofendimin e moshatarëve apo shokëve të shkollës.
Kjo e mundon së tepërmi. Edisoni së bashku me dy vëllezërit e tjerë nuk ka tavolinë as karrige për të bërë mësimet apo detyrat.zgjidhja është dyshemeja e banesës. /Ismail Buçpapaj/
*Këtu mund të dergoni ndihmen tuaj për familjen Malaj
