TIRANË- Partia Demokratike ka kundërshtuar kalimin e spitalit të Traumës në varësi të Mbrojtjes. Albana Vokshi në seancën e të enjtes i kërkoi kryeministrit të mos ndryshojë destinacionin e këtij spitali. Më herët VKM është kundërshtuar nga nënkryetari i Lëvizjes Socialiste për Integrim, Petrit Vasili, i cili e ka cilësuar rikthimin e Traumës në Spital Ushtarak si “një hap mbrapa”.
Por ky ndryshim u kundërshtua edhe nga profesorët dhe mjekët e këtij spitali, pasi sipas tyre, ishte në dëm të pacientëve. Kështu mjekët e njohur Tefik Zhurda, Skënder Buci, Myftar Torba, Ilir Kajo dhe Alfred Gega reaguan pas shkresës së datës 27.08.2015, të firmosur nga sekretari i Përgjithshëm i Kryeministrisë, Engjëll Agaçi, ku urdhërohej ngritja e grupit ndërinstitucional të punës për vlerësimin e gjendjes, përcaktimin e masave dhe përgatitjen e akteve ligjore e nënligjore për kalimin e Shërbimit të Emergjencave Civile dhe të Spitalit Universitar të Traumës, në vartësi të Ministrisë së Mbrojtjes.
Mjekët e SUT i dërguan edhe një letër kryeministrit, Edi Rama, ku përmes argumenteve kërkonin rishikimin e urdhrit të Agaçit.
