Një mjegull si mur, siç nuk ishte parë ndonjëherë në vitet e fundit ka shkaktuar kaos në autostradën A22, mes Reggiolo dhe Caprit në Itali. Rreth shtatëdhjetë automjete u përfshinë në grumbullimin e madh të automjeteve dhe aksidente të tjera zinxhirore, të cilat mëngjesin e djeshëm e vendosën në krizë aksin rrugor nga Veriu në Jug në Autobrennero, i mbyllur deri në orën 14:00.
Një shqiptar ka ndëruar jetë ndërsa 7 persona të tjerë janë dërguar në spital me ambulancë, dy prej të cilëve të sëmurë rëndë.
Persona të tjerë që shkuan në mënyrë të pavarur në urgjencë thanë se numri i të lënduarve ishte rreth tridhjetë, shkruajnë mediat italiane.
Pati tre aksidente kryesore, të cilat ndodhën brenda pesë kilometrave midis Reggiolo dhe Budrione.
Aksidenti i parë që ndodhi orët e mëngjesit, para orës 08:00, u shkaktua nga një kamion që transportonte bagëti të gjalla. Shoferi i mjetit të rëndë humbi kontrollin dhe përfundoi mes dy karrexhatave, në afërsi të Budrione di Carpi. Për mjetet që vinin nga pas, pamja e të cilëve ishte e kufizuar për shkak të mjegullës, parakalimi ishte i pamundur, por edhe frenimi në kohë… Për pasojë këtu ndodhi përplasja zinxhir e makinave, furgonëve e mjeteve të tjera të tonazhit të rëndë.
Me dhjetëra ambulanca shkuan në vendngjarje për t’u ardhur në ndihmë të lënduarve, por edhe patrullave të policisë. Tek ky aksidenti pati disa të plagosur rëndë, por fatmirësisht pa humbje jete.
Pak kohë më pas, rreth orës 09:00, në afërsi të Rolo ndodhi një tjetër përplasje. I ngjashëm më të parin edhe këtu u përfshinë disa mjete, edhe të tonazhit të rëndë. Një person u dërgua me helikopter në spitalin e Bolonjës. Ai ndodhet në gjendje të rëndë. Dy të tjerë mbetën të plagosur po ashtu, por pa rrezik për jetën.
Në 09:55, po në Rolo, në përplasjen tjetër u përfshinë gjithashtu mjete të tonazhit të rëndë. Të plagosurit në këtë rast ishin dy, të cilët u dërguan në urgjencën e Capri-t.
Më i rëndi në mesin e aksidenteve ndodhi në Campogalliano, në një kohë kur mjegulla ishte larguar, por kaosi në rrugë vijonte.
Në orën 11:55 dy kamionë, njëri prej të cilëve drejtohej nga shqiptari Luçjan Marku, u përplasen me njëri-tjetrin. Shoferi i u nxor nga mjeti nga shërbimet e emergjencës dhe u ndërhy me helikopter nga Bolonja. Por tentativa për ta shpëtuar dështoi. 43-vjeçari shqiptar nuk mundi të mbijetonte dhe fatkeqësisht humbi jetën.
