Një automjet është gjetur ditën e sotme në ujërat e liqenit të Shkopetit. Makina tip “Renault” pa targë, me ngjyrë të zezë është gjetur rreth 60 metra larg vendit ku në muajin korrik u nxorën tre automjete nga polumbarët e Reneas. Burime zyrtare nga policia, bëjnë me dije se kjo ngjarje është konstatuar pas një denoncimi të bërë nga një kalimtar i rastit, ndërsa mjeti ka qenë i mbuluar me ujë deri në gjysmën e tij.
Në brendësi të automjetit nuk kishte njeri dhe dyshohet se ky automjet është hedhur në Liqen brenda harkut kohor 3-4 mujor. Policia bën me dije se, nga këqyrja paraprake e automjetit nuk është konstatuar ndonjë send i kundërligjshëm.
Automjeti është nxjerrë në rrugë dhe do transportohet në Komisariatin e Policisë Mat, për veprime të mëtejshme.
