Plazhet më të njohura të Sidnejit të Australit janë mbushur me qindra zogj të ngordhur.
Pulëbardhat bishtshkurtër, zogj migrator që kthehen në jug të Australisë për t’u ushqyer pasi e kalojnë verën në Alaskë, u gjetën në vijën bregdetare të Bondi, Manly dhe Cronulla.
Këtyre zogjve iu duhet ushqim i konsiderueshëm për të përballuar udhëtimin prej 14 mijë kilometrash mbi Paqësor por ekspertët ngritën alarmin se kësaj here u regjistrua një numër më i madh shpendësh që ngordhën për shkak të mungesës së ushqimit. Kjo sipas tyre lidhet ngushtësisht me ngrohjen globale pasi peshqit me të cilin ata ushqehen mungojnë në cekëtinë, për shkak të rritjes së temperaturave të detit.
Çdo vit mbi 30 mijë zogj mbërrijnë në ishullin Griffith të Australisë, por kësaj radhe mendohet se numri i tyre do të jetë i përgjysmuar./Opinion.al
