Në harkun kohor të 5 ditëve, dy çerdhe në Tiranë janë përfshirë nga flakët. Rasti i parë më datë 16 gusht, në orët e para të mëngjesit në çerdhen e fëmijëve nr. 14 në zonën e Ali Demit. Për këtë ngjarje, policia tha se flakët u shkaktuan nga rrjedhja e gazit, të cilat përfshinë një magazinë pas çerdhes. Në atë kohë, banorët e vegjël dhe as personeli nuk ishin në godinë. Më pas burimet mediatike, thanë se policia po heton për zjarrvënie të qëllimshme për shkak të një konflikti me pronarët e tokës. Sakaq, Bashkia e Tiranës që ka nën menaxhim institucionet e rritjes dhe edukimit të fëmijëve u përpoq të minimizonte ngjarjen, duke thënë se aktiviteti vazhdon normalisht.
“Ka një disinformim për një ngjarje që ka ndodhur ngjitur me godinën e çerdhes, dhe jo në godinën e çerdhes. Aktiviteti vazhdon normal dhe konform parametrave. Sa i përket sigurisë së elemetëve të shërbimit dhe në rastin konkret bombolave të gazit, ato janë me certifikatë.Është një ngjarje që aludohet nga keqbërës në komunitet”, do të shprehej Zhaneta Beqiri, drejtoresha e çerdheve për Tiranën.
Deri më sot nuk ka asnjë person që ndiqet penalisht për flakët në çerdhen e Ali Demit.
Ndërsa, mbrëmjen e sotme, 21 Gusht, policia e Tiranës njoftoi se një tjetër zjarr ka rënë në çerdhe. Bëhet fjalë për çerdhen nr 16 në zonën e Bllokut në Tiranë. Në një njoftim të shkurtër, policia tha “rreth orës 19:25, në rrugën “Nikolla Tupe”, në katin e dytë të godinës së “Çerdhes Nr.16”, ka rënë zjarr. Në godinë nuk ndodhen njerëz. Në vendngjarje janë shërbimet e Komisariatit të Policisë Nr.2 dhe Zjarrfikësja, të cilët bënë fikjen e zjarrit”.
Deri më tani për të dyja këto ngjarje ende nuk ka një përgjegjës, ndërkohë që ky është muaji ku bëhet edhe regjistrimi i fëmijëve në çerdhe për të rinisur punën në muajin shtator.
Kujtojmë se çerdhja nr. 16 që u dogj sot në Bllok, ku shkaqet ende nuk dihen, është rikonstruar në 2015 dhe inauguruar nga Erion Veliaj.
/R. Dedaj-Opinion.al
*Pamje nga zjarri ne cerdhen 16
*Zjarri ne cerdhen 14
*Foto e inaugurimit te cerdhes ne zonen e Bllokut
