Një sasi prej të paktën 7.8 tonë mish pule i kontaminuar me salmonelë është importuar nga Brazili pak ditë më parë në vendin tonë.
Me daljen e analizave, Autoriteti Kombëtar i Ushqimit ka mundur të bllokojë vetëm 5.2 tonë ndërsa pjesa tjetër dyshohet se është hedhur në treg.
“Sasia e mishit ka hyrë në territorin shqiptar në datën 11 Mars në Portin e Durrësit aty ku i është nënshtruar edhe marrjes së mostrave për analiza në bazë të riskut që mbartin produkte të tilla. Vetëm në datën 21 Mars ka dalë përgjigja e analizave, ku është konfirmuar prania e salmonelës”, raportoi gazetarja Erikleda Dorezi.
Një pjesë e mishit të kontaminuar ka përfunduar në treg.
“Për shkak se kompania ka deklaruar fatura fiktive dhe për shkak të deklarimeve jo të sakta të kompanisë, një pjesë e mishit ka përfunduar në tregun shqiptar. Pjesa më e madhe është asgjësuar nga AKU ndërsa pjesa tjetër është hedhur në treg. Për këtë arsye të gjithë inspektorët e AKU-së janë në terren duke verifikuar subjektet tregtare për praninë e këtij produkti”, raportoi gazetarja.
Prania e salmonelës në organizëm ka pasoja shëndetësore si temperaturë, diarre dhe të vjella.
“Në të gjitha rastet vetëm analizat laboratorike mund ta konfirmojnë praninë e salmonelës. Nëse produkti i mishit nuk është gatuar në temperaturën mbi 70 gradë dhe në kushte shumë të mira higjenike, dihet që ka pasoja shëndetësore te popullata por varet edhe te sasia mikrobike që mund të mbartë ky produkt. Në njerëz të ndryshëm ka pasoja të ndryshme”, raportoi gazetarja Dorezi.
