Projektligji për vetting në polici është miratuar sot në Kuvend me 79 vota pro, 6 kundër dhe 4 abstenim. Ajo që ra në sy ishte vota abstenim e ish-ministrit të Brendshëm Fatmir Xhafaj, i cili dhe gjatë fjalës së tij kritikoi ligjin për vettingun në polici.
Një nga ndryshimet që Ministri Lleshaj thotë se do të bënte të mundur përfundimin e këtij procesi në një kohë optimale është që punonjësit e Shërbimit të Çështjeve të Brendshme dhe Ankesave të kalonin të parët filtrin e vetting-ut dhe më pas të ishte kjo strukturë që të drejtonte këtë proces për dy nivelet e tjera të Policisë së Shtetit. Kjo sipas Lleshajt do të ulte dhe kostot e procesit.
Por ndryshe mendon paraardhësi i tij, Fatmir Xhafaj, i cili hartoi këtë ligj. Ai i cilëson ndryshimet të panevojshme dhe që mund të prekin besueshmërinë e këtij procesi.
Ndërkohë, nga blloku i opozitës, në votim ishin prezent 12 deputetë, ndërsa mungonin Lefter Koka dhe Rudina Hajdari./ Opnion.al E.Xh.
