Partia Socialiste dhe PD e Rithemelimit kanë arritur dakordësinë për ngritjen e dy komisioneve hetimore, për rrjedhjen e të dhënave në sistemin TIMS, si edhe PPP-të në Shëndetësi.
Palët u ulën sot në tryezën e Konferencës së Kryetarëve ku i vendosën vulën negociatave, që pritet t’i japin fund edhe kaosit prej 5 muajsh në Kuvend.
Bazuar në kërkesën zyrtare të Gazment Bardhit drejtuar kryeparlamentares Lindita Nikolla, pritet që në muajt në vijim të zhvillohen komisionet hetimore që kanë të bëjnë me sistemin e të dhënave TIMS, PPP-të në Shëndetësi si dhe çështjen e Sterilizimit.
Deri më tani dihen detaje vetëm për komisionin hetimor mbi të dhënat e TIMS, i cili pritet të mbahet për 4 muaj që nga data e miratimit dhe në përbërje do të ketë 15 anëtarë. Prej tyre, 6 bashkë me kryetarin propozohen nga grupi parlamentar i PD-së dhe 8 të tjerë nga grupi i Partisë Socialiste.
