Masat e sigurisë në Europë janë rritur kudo dhe kjo vlen edhe për aktivitetet sportive. Autoritetet austriake nuk do t’ia lënë asgjë rastësisë, edhe pse nuk pritet ndonjë rrezik i lartë.
Policia lokale do të angazhojnë 300 forca policore në sfidën që përfaqësuesja vendase do të zhvillojë me atë shqiptare të shtunën në orën 17:30 në stadiumin “Ernst Happel” të Vjenës.
Mes forcave të sigurisë do të ketë edhe reparte speciale dhe qen antiekspolziv, që do të patrullojnë gjatë të gjithë kohës.
Një masë e shtuar për shkak të rrezikut të terrorizmit që po krijon probleme në disa vende. Me mijëra tifozë pritet të ndjekin këtë takim, të parin për këtë vit si për Shqipërinë edhe për Austrinë.
Kontrollet do të jenë më të rrepta edhe për ata që do të ndjekin sfidën. Miqësorja Austri – Shqipëri do të transmetohet eskluzivisht në Klan dhe Klan HD.
