Përdorimi i fjalorit banal nga parlamentarët dhe anëtarët e qeverisë, ka qenë jo pak herë i pranishëm në sallën e Kuvendit të Shqipërisë. Ekskluzivitetin e transmetimit të këtij “show” aspak të hijshëm e ka patur seanca e përjavshme e së enjtes, por tashmë mesa duket politikanëve nuk po ju pritet dhe kanë filluar ta shpalosin një fjalor të tillë edhe në rrjetet sociale.
Në një status të dytë adresuar presidentit Meta, Ministrja e Shtetit për Marrëdhëniet me Parlamentin, ose ndryshe zëdhënësja e qeverisë, Elisa Spiropali ka përdorur fjalën “llaxore”.
“Poshtë Soreca, Borchardt, Palmer, Juncker, Glover, Mogherini, Lajcak, Hahn,Moavero e kush të jetë me ta, mbi ta, pas tyre megjithë Soros e sorrollop, i tërë soji i armiqve të shqiptarit Baba Xhike, me dy krena e me qafore,që hedh bomba mbi çdo llaxore dhe mahnit çdo fallxhore” shkruan Spiropali në Twitter, në tentativë për të krijuar një rimë me fundoren “re”.
Disa orë më parë Ministrja ju drejtua me një status tjetër presidentit ku i drejtohej me “Baba Xhike” dhe e akuzonte se donte “të vriste” reformën në drejtësi.
Megjithatë ende nuk ka ndonjë reagim nga zyra e presidencës në lidhje me këto deklarata, që duhet thënë se kanë kaluar sensin e etikës. /Opinion.al
