Ministrja e Shëndetësisë, Albana Koçiu, gjatë fjalës së mbajtur në Kongresin e Partisë Socialiste foli për kantieret e reja që do të nisin vitin e ardhshëm në infrastrukturën shëndetësore.
Ministrja Koçiu deklaroi sot zgjerimin e autonomisë spitalore në të tjera struktura spitalore në vendin tonë, pas modelit të parë nisur me Spitalin Memorial Rajonal të Fierit.
“Janë krijuar më në fund kushtet për të vënë në zbatim të gjerë modelin e administrimit të provuar me sukses në Spitalin “Memorial” të Fierit, i cili është një model i parë i zbatimit të autonomisë spitalore. Jemi gati të zgjerojmë këtë model edhe në QSUT, Spitalin e Shkodrës, Spitalin e Durrësit dhe atë të Vlorës. Qëllimi ynë është që deri në vitin 2027 të kemi 17 struktura spitalore tërësisht autonome”, deklaroi Koçiu.
Ministrja informoi edhe për hapjen e 15 spitaleve dhe 60 qendrave shëndetësore deri në 2025.
“20 spitale dhe 340 qendra shëndetësore është bilanci i deritanishëm. Deri në 2025, i shtojmë kësaj liste 15 spitale dhe 60 qendra shëndetësore më shumë”, deklaroi Koçiu.
Ministrja është ndalur edhe rritja e shërbimeve digjitale në sektorin e shëndetësisë, ku theksoi se “ do të fuqizojmë sistemet tona dixhitale, telemjekësinë, si një mënyrë për të rritur aksesin në marrjen e shërbimit më të mirë kudo në territor”.
Një pikë e rëndësishme për MSHMS-në është edhe turizmi shëndetësor për të cilin ministrja Koçiu tha se “do të mbështesim më tej zhvillimin dhe përfshirjen e një modeli ekselent të këtij sektori në sistemin tonë publik”.
“Jam e sigurt që së bashku, në koalicionin tonë të madh me qytetarin, do të bëjmë të mundur që Shqipëria e vitit 2030, të jetë një vend ku: Të gjithë spitalet dhe qendrat mjekësore të jenë 100% moderne dhe të pajisura me teknologjinë e fundit. Të gjithë mjekët dhe infermierët të përfitojnë paga sa mesatarja e vendeve të Bashkimit Evropian. Të gjithë qytetarët të përfitojnë nga mbulimi shëndetësor universal falas si dhe të gjitha shtresat në nevojë, të ndihen plotësisht të barabartë, në shoqërinë tonë”, përfundoi ministrja e Shëndetësisë dhe Mbrojtjes Sociale, Albana Koçiu.
