Ministrja e re e Infrastrukturës, Belinda Balluku ka anuluar koncesionin e rrugës Thumanë-Kashar. Balluku deklaroi se këto para do të përdoren për përdoren “Paktin për Universitetin”.
Në deklaratën e parë për mediat, ministrja Balluku u shpreh: “Kam vendosur ndërprerjen e procedurës së partneritetit publik-privat për aksin Thumanë-Kashar. Hapësirën e konsiderueshme fiskale të këtij projekti qeveria do ta dedikojë në funksion të zbatimit të angazhimeve për Paktin e Universitetit, në fushën e infrastrukturës arsimore, qoftë asaj dixhitale dhe qoftë asaj fizike”.
Megjithatë, ajo theksoi se rruga nuk do të mbetet pa u bërë, por projekti i Thumanë-Kashar do të përfshihet në projektin për ndërtimin e rrugës Kashar-Rrogozhinë.
“Natyrisht ne nuk do të heqim dorë nga ndërtimi i këtij aksi të rëndësishëm kombëtar, aq më tepër që projekti është gati. Ky aks ka një rëndësi shumëfishe dhe jemi duke studiuar përfshirjen e tij në projektin e zgjerimit të rrugës Tiranë-Durrës, ku në fazën e tij të parë parashikohet ndërtimi i aksit Tiranë-Ndroq-Plepa, dhe në fazën e dytë ndërtimi i aksit Kashar-Rrogozhinë. Ideja është që pikërisht këtij aksi t’i shtohet dhe aksi Thumanë-Kashar, i cili garanton qoftë hyrjen e shpejtë në Tiranë nga veriu dhe qoftë aksesin më të shpejtë nga veriu drejt jugut gjatë sezonit turistik. /Ri-De
