Ministrja e Jashtme e Kosovës, Donika Gërvalla, ka deklaruar se vijimësia e dialogut me Serbinë është e vështirë nëse shteti serb nuk sanksionohet nga ndërkombëtarët.
Teksa ka dhënë një deklaratë për mediat pas ministerialit të ministrave të Jashtëm të Procesit të Berlinit në Tiranë, Gërvalla tha se Kosova e ka të vështirë të ulet në tryezën e dialogut me një partner që në të njëjtën kohë trajnon terroristë që të sulmojnë Republikën e Kosovës.
“Është shumë e rëndësishme që të kuptohet mesazhi që na ka dërguar Serbia dhe bashkësisë ndërkombëtare dhe të merren masat e nevojshme.
Serbia sillet si një mini Rusi e cila çdo shtet fqinj të saj e trajton në atë mënyrën që mendon se ata kanë të drejtë, që ata duhet t’u kthehen shteti serb.
Prioritet kryesor i institucioneve të Republikës së Kosovës është siguria. Duhet të sigurohemi që armatimi që kemi gjetur është shumica e armatimit. Kemi gjetur armë nëpër vetura, ndërtesa, nëpër shtëpitë e terroristëve që kanë kryer sulmin.
Nëse bashkësia ndërkombëtare e lë Serbinë të kalojë pa pasoja, atëherë e shohim të pamundur vëzhdimësinë e negociatave.
Duhet të ketë prioritet siguria, procesi i dialogut nuk duhet të jetë sa për të bërë foto, por duhet të jetë i dizajnuar në atë formë që të prodhojë sukses. Me një partner dialogu në tavolinë, në të njëjtën kohë trajnon terroristë që të sulmojnë Republikën tonë, është shumë e vështirë për ne që të ulemi.
Është e qartë që pa sanksionuar Serbinsë, ajo nuk ka për ta mësuar. Qytetarët e Serbisë do kenë të vështirë të ngrenë zërin për të disiplinuar qeverinë e tyre për kërkesa”, u shpreh ministrja e Jashtme e Kosovës./Opinion.al
