Një vajzë vetëm 7 vjeç ndërroi jetë në spitalin e Durrësit mbrëmjen e djeshme rreth orës 22:00. Deri sot në mesditë askush nuk është në gjendje të thotë se çfarë e shkaktoi vdekjen e të miturës. Ministria e Shëndetësisë përmes një njoftimi apelon qytetarët të bëjnë vaksinën e gripit edhe pse nuk sqaron nëse ishte pikërisht gripi që shkaktoi mortalitetin.
Sakaq, ministria përpiqet të vërë në dukje faktin se mjekët punuan me përkushtim për ta mbajtur në jetë, ndërsa ekspertët po analizojnë nëse shkaku i vdekjes lidhet apo jo me gripin stinor.
A po qarkullon në vend një grip vdekjeprurës apo jo? Cili është lloji i gripit që kishte kapur 7-vjeçaren dhe komplikacionet që shkakton? A i është bërë autopsia për të zbuluar shkakun e vdekjes? Këto janë pyetjet e Opinion.al që Ministria e Shëndetësisë nuk mundi ti përgjigjet.
Sakaq në njoftim thuhet se “Ministria e Shëndetësisë dhe Mbrojtjes Sociale ka siguruar vaksinën falaspër disa kategori, si: fëmijët, të moshuarit me sëmundje kronike, gratë shtatzëna, etj.”
Edhe pse jemi në mesin e Janarit, Ministria në fjalë nuk kishte bërë ndonjë fushatë ndërgjegjësuese për këtë çështje. Sot, pas vdekjes së të miturës, bëhet e ditur se “janë gjendje 9 000 mijë doza vaksine”.
Pikërisht sot njoftohet se “katër qendra shëndetësore në Tiranë do të kalojnë në shërbim 24 orësh, për t’ju ardhur në ndihmë qytetarëve, të cilët do të mund ta marrin shërbimin ditën dhe natën pranë lagjeve të tyre, pa patur nevojë të shkojnë në spitale”.
/R.Dedaj-Opinion.al
Njoftimi i plotë për mediat i Ministrisë së Shëndetësisë dhe Mbrojtjes Sociale
Ministria e Shëndetësisë dhe Mbrojtjes Sociale shpreh dhimbjen për fatkeqësinë e ndodhur në spitalin e Durrësit, ku një 7 vjeçare humbi jetën pasi u paraqit në gjendje të rëndë në spital. Ekipi i mjekëve me përkushtim e profesionalizëm bënë maksimumin për ta mbajtur fëmijën në jetë, ndërsa ekspertët po analizojnë nëse shkaku i vdekjes lidhet apo jo me gripin stinor.
Lidhur me situatën e gripit, Ministria e Shëndetësisë dhe Mbrojtjes Sociale ka ndëmarrë Planin e masave për përballimin e qarkullimit të gripit në vend. Në të njëjtën kohë i bëjmë apel qytetarëve të mos neglizhojnë shenjat e gripit por të konsultohen me mjekun e familjes për të parandaluar komplikacionet.
Nga të dhënat e Institutit të Shëndetit Publik, aktualisht vihet re një rritje e qarkullimit të gripit dhe virozave por nuk kemi situatë epidemie të gripit.
Ministria e Shëndetësisë dhe Mbrojtjes Sociale I bën thirrje qytetarëve të mos I neglizhojnë gjestet parandaluese, duke ndjekur disa këshilla të thjeshta po mjaft të vlefshme për një dimër pa viruse.
Për të gjithë kategoritë në rrezik për komplikacione, Ministria e Shëndetësisë dhe Mbrojtjes Sociale ka siguruar vaksinën FALAS për gripin stinor, duke filluar nga fëmijët, të moshuarit me sëmundje kronike, gratë shtatzëna, etj.
Janë ende gjendje 9000 mijë doza vaksine FALAS, ndaj ftojmë popullatën në risk të vaksinohet.
Ministria e Shëndetësisë dhe Mbrojtjes Sociale do të zgjerojë shërbimin në mënyrë që të përballohet fluksi I pritshëm në këtë periudhë.
Përveç spitaleve, katër qendra shëndetësore në Tiranë do të kalojnë në shërbim 24 orësh, për t’ju ardhur në ndihmë qytetarëve, të cilët do të mund ta marrin shërbimin ditën dhe natën pranë lagjeve të tyre, pa patur nevojë të shkojnë në spitale.
Përkatësisht:
▫Qendra Shëndetësore nr 6 në Kombinat,
▫Qendra Shëndetësore nr 7 në Laprakë,
▫Qendra Shëndetësore nr 8 në zonën e ish-Bllokut,
▫Qendra Shëndetësore nr 10 në zonën e Oxhakut.
