Gjatë informimit mbi situatën epidemiologjike në vend, Ministria e Shëndetësisë ka njoftuar qytetarët të shmangin ceremonitë e çdo lloji, pasi janë burim i përhapjes së infeksionit.
“Vendosni detyrimisht maskën në çdo ambient të mbyllur dhe kudo ku nuk është e mundur mbajtja e distancës, vendosni maskë apo barrierë mbrojtëse edhe në ambientet e hapura. Shmangni grumbullimet masive, ceremonitë e çdo lloji, pasi janë burim i përhapjes së infeksionit”, njofton ministria.
Ndërkohë, situata në spitale vijon të jetë thuajse e njëjtë, me 117 persona të shtruar.
“Aktualisht në spitalin Infektiv dhe “Shefqet Ndroqi” po trajtohen 117 pacientë të konfirmuar pozitivë me COVID-19, 16 në terapi intensive, 5 prej të cilëve të intubuar. Ju informojmë se në dy spitalet COVID po vijojnë të trajtohen edhe 12 pacientë të cilët kanë qenë pozitivë me COVID19 dhe aktualisht janë negativizuar, por po vijojnë të marrin trajtim spitalor për pasojat e sëmundjes. Në spitalin Infektiv dhe “Shefqet Ndroqi”, përveç pacientëve të konfirmuar pozitivë me COVID19, vijon të ketë rritje të numrit të pacientëve të dyshuar të prekur nga virusi i rrezikshëm, të cilët po trajtohen sipas protokolleve përkatëse”, njofton ministria.
Në 24 orët e fundit, 2 qytetarë humbën jetën nga Covid dhe u regjistruan 119 raste të reja./Opinion.al
