Ministria e Mbrojtjes bëri me dije se kanë aktivizuar Mekanizmin Europian të Mbrojtjes Civile në betejën kundër zjarreve. Për këtë arsye në territorin e Shqipërisë janë izoluar tre vatra zjarri.
Mësohet se në Finiq, Forcës Ajrore Shqiptare i ka ardhur në ndihmë Greqia me dy avionë zjarrfikës. Për këtë arsye është vënë nën kontroll zjarri në masivin malor të Shtugarit dhe në zonën ndërkufitare.
“Koordinimi i ngushtë ndërmjet Qendrës Kombëtare Operacionale të Emergjencave Civile (AKMC) dhe Agjencisë Greke të Mbrojtjes Civile bëri të mundur hyrjen nga pika kufitare të mjeteve ajrore greke dhe realizimin me efikasitet të misionit. Aktualisht, situata në Finiq është nën kontroll dhe e stabilizuar”, njoftoi ministria.
Një ndërhyrje nga ajri është realizuar edhe në Poliçan. Flakët atje rrezikonin zona të pyllëzuara të paarritshme nga toka. Ndërkohë siç e kemi raportuar edhe më herët, në Elbasan është bërë e mundur fikja e zjarrit që nisi para gjashtë ditësh.
Ministria e Mbrojtjes, i bën thirrje qytetarëve që të bëjnë kujdes maksimal.
“Në këto ditë të nxehta, me rrezik të lartë zjarresh në të gjithë rajonin e Mesdheut, siç paralajmërohet edhe nga harta zyrtare e shërbimit Copernicus EMS kërkohet kujdes maksimal nga qytetarët”, njoftoi ministria e cila kërkoi të mos ndizen zjarre në natyrë në këtë kohë dhe në rast rreziku të njoftohen autoritetet.
