Ministria e Ekonomisë e Kosovës u ka bërë thirrje qytetarëve që të kursejnë energjinë elektrike, pasi, sipas këtij institucioni, konsumi ka arritur në nivel shumë të lartë dhe po e rrezikon rrjetin energjetik.
Përmes një postimi në Facebook, ministria tha se mbrëmjen e 24 dhjetorit ka mbajtur një takim me Operatorin e Sistemit, Transmisionit dhe Tregut (KOSTT) dhe me Kompaninë për Shpërndarjen e Energjisë Elektrike (KEDS) për të trajtuar situatën me furnizimin me energjinë elektrike, pas ankesave që qytetarët kanë bërë ditëve të fundit.
“KOSTT dhe KEDS raportojnë se, me uljen e temperaturave, konsumi i energjisë elektrike ka arritur nivele shumë të larta, mbi 1400 MW në kohë të caktuara. Si rezultat, sistemi ynë elektro-energjetik është ngarkuar tej mase, duke shkaktuar vështirësi teknike në furnizim dhe duke e rrezikuar rrjetin; kësisoj, ka qenë e domosdoshme që operatorët të bëjnë shkyçje në disa vendbanime ku ngarkesa ka qenë e papërballueshme për rrjetin”, tha Ministria e Ekonomisë.
“Përgjatë javës në vijim, për të ndihmuar sistemin elektro-energjetik, lusim qytetarët që të jenë sa më të kujdesshëm në konsumin e energjisë, sidomos gjatë orëve të paradites nga ora 09:00-12.00 dhe pasdites nga ora18:00-00:00. Kursimi i energjisë në këto orë është thelbësor për të shmangur mbingarkesat dhe për të ruajtur funksionalitetin e sistemit për të gjithë”, tha Ministria e Ekonomisë.
Kosova aktualisht prodhon energji elektrike në dy termocentralet, Kosova A dhe B, që funksionojnë me thëngjill. Por, shteti po ashtu importon rrymë me qëllim që të përmbushë kërkesat në rritje të konsumatorëve./REL
