Ministri i Financave dhe Ekonomisë Ervin Mete, në konferencë për median të mbajtur ditën e sotme bëri një bilanc për vitin 2023 dhe pritshmëritë e vitit 2024.
Ai tha se në mesin e vitit 2024 do të ketë një rritje të konsiderueshme të pagave me synimin që brenda vitit të arrihet paga mesatare 900 euro.
” Në muajt e parë të vitit do të finalizohen vendimet që specifikojnë rritjen për të gjitha kategoritë. Në mesin e vitit 2024 do të ketë një rritje të konsiderueshme të pagave, me synimin që brenda këtij viti të arrijmë pagën mesatare prej 900 euro në sektorin publik” – tha Mete.
Ndër të tjera Mete tha se në të gjitha zonat do të aplikohet çmimi i referencës në shitje në raport me moshën e ndërtesës, ndërsa parashikohet rishikim i çmimeve të referencës edhe në zonat bregdetare.
“Në kuadër të ligjit “Për tatimin mbi të ardhurat” është hartuar edhe udhëzimi i ri, lidhur me taksimin e kalimit të pronësisë, ku kemi gjetur me vend të vendosim një rregull të ri. Në të gjitha zonat do të aplikohet çmimi i referencës në shitje, në raport me moshën e ndërtesës, ku për çdo vit vjetërsi, çmimi do të ulet me 1%. Gjatë këtij viti, do të ketë një rishikim të çmimeve të referencës edhe në zonat bregdetare”-tha Mete.
