Ministri i Drejtësisë i Holandës, Ferdinand Grapperhaus, ka kritikuar djegien e mandateve nga ana e opozitës.
Gjatë një vizite në Tiranë, ai u shpreh se Parlamenti është vendi ku zgjidhen problemet dhe ngërçet politike. Teksa ka shprehur shqetësimin për dhunën në protestat e opozitës, ministri Holandez foli dhe për procesin e integrimit të Shqipërisë në Bashkimin Europian.
Grapperhaus tha se qeveria holandeze është në pritje të raportit të majit të Komisionit Evropian për të vlerësuar progresin e Shqipërisë për çeljen e negociatave.
“Më vjen keq që opozita ka marrë vendimin t’i djegë mandatet dhe dalja nga Kuvendi nuk është mënyra për të zgjidhur problemet politike dhe shkon kundër parimeve demokratike. Partia ime nuk ka qenë e përfshire në qeveri për 5 vite me radhë dhe na është dashur që ti ndiqnim zhvillimet nga jashtë më syrin kritik. Parlamenti është forumi ku duhen trajtuar çështjet kritike për vendimin dhe është baza dhe themeli i çdo demokracie.
Ne si qeveri do të diskutojmë dhe do te vendosim bashkë me Parlamentin në Holandë. Së pari nga të gjitha kontaktet unë e shoh që qeveria e Shqipërisë po punon për këtë ndërmarrje monumentale siç është reforma në drejtësi. Kjo tregon se qeveria e Shqipërisë është serioze për të arritur atë që ka thënë komisioni”-tha Ferdinand Grapperhaus.
Kujtojmë që Holanda është një nga tre vendet që votuan për shtyrjen e hapjes së negociatave të BE me vendin tonë. / Opinion.al E.Xh.
