Takimi i radhës i samitit të “Minishengenit” për vendet e Ballkanit Perëndimor, është mbajtur këtë të shtunë në Tiranë, pas dy takimeve të mëparshme në Novi Sad dhe Ohër. I pari që ka folur në konferencën për mediat, ka qenë kryeministri Edi Rama. Ai kritikoi Kosovën për refuzimin e pjesëmarrjes në këtë samit.
“Refuzimi i përsëritur i Kosovës për të marrë pjesë në këtë tryezë është i pakuptueshëm dhe i dëmshëm për vetë Kosovën. Ne jemi këtu për të ndërtuar urën midis të shkuarës dhe të ardhmes. Midis të shkuarës që na ndan dhe të ardhmes që na bashkon”, tha Rama.
Sipas tij “ky proces është në koherencë të plotë, me ambicien për tu bërë pjesë e familjes evropiane, duke bashkuar forcat për ta përshpejtuar procesin e integrimit të BE dhe për të krijuar në hapësirën tonë, standardet që i përgjigjen 4 lirive të BE-së”.
“Plagët e të shkuarës nuk kurohen me helm dhe acid, por me ilaçe dhe ilaçet nuk i shpikim mjafton të shikojmë si kanë funksionuar në realitet të ngjashme”, theksoi më tej Rama.
Liderët e Ballkanit vizituan mëngjesin e së shtunës Durrësin, si një nga zonat më të prekura nga tërmeti i 26 Nëntorit. Aty Ramës, Zaevit dhe Vuçiçit iu bashkua edhe Presidenti i Malit të Zi, Milo Gjukanoviç, i cili kishte konfirmuar më parë pjesëmarrjen në këtë samit.
Ndërkohë në Bulevardin “Dëshmorët e Kombi” qytetarët mbajtën një protestë kundër ardhjes së President Vuçiç në Shqipëri.
Kryeministri Rama priti dje pasdite presidentin e Serbisë, Vuçiç dhe kryeministrin e Maqedonisë se Veriut, Zaev. Në një intervistë për mediat serbe, Vuçiç theksoi se, takimi i radhës do të mbahet në fund të Janarit në Beograd./ Opinion.al
