Sponsorët, edhe ditët e sotme, vazhdojnë të mbeten shtyllë e futbollit. Pas të gjithë klubeve, që janë në gjendje shumë të mirë ekonomike, fshihet një sponsor mjaft i fuqishëm. Kjo shpjegohet më mirë te klube si Mançester Junajtid, Barcelona, Çelsi, Reali, të cilat vit pas viti vazhdojnë të shpenzojnë shifra marramendëse në merkato, por përsëri gëzojnë një shëndet mjaft të mirë financiar.
Futbolli në ditët e sotme është kthyer më shumë në një betejë marketingu, ku sponsorët më të fuqishëm ndeshen për të përfituar të drejtat e klubeve më të fuqishme europiane. Në një listë ku shfaqen sponsorët, të cilët paguajnë më shumë për të bërë pjesë tek ekipet elitare të Europës, bien në sy edhe shifra marramendëse si ajo që kompania e makinave Shevrole i paguan Mançester Junajtid (70 milionë euro), me anglezët, të cilët e kryesojnë këtë listë.
