Tre persona, në kërkim nga autoritetet italiane, janë ekstraduar një ditë më parë nga vendi ynë drejt Italisë.
Burime zyrtare bëjnë me dije se ata janë 35-vjeçari Florijan Kokonuzi, 28-vjeçari Gerald Gjoni dhe 45-vjeçari Dritan Cela, shkruan Syri.net.
Ata ishin pjesë e një grupi që merrej me trafikimin e drogës, ndaj të cilëve, gjykata e Anti-mafias së Milanos ka nxjerrë vendimet e arrestit me burg për akuzat e trafikimit të lëndëve narkotike në bashkëpunim dhe krijim të organizatës kriminale.
Arrestimet
Kokonuzi, Gjoni dhe Çela janë arrestuar gjatë orëve të para të mëngjesit të 28 majit të vitit 2014 në Tiranë, në kuadër të operacionit të koduar “Riccio”.
Po mëngjesin e 24 majit, janë arrestuar edhe persona të tjerë të grupit, 29-vjeçari Gazment Dimni në Kavajë dhe 34-vjeçari Erald Zyka në Durrës.
Ndërkaq, vitin e kaluar, policia italiane në Milano, kishte arrestuar gjatë të njëjtit operacion të koduar “Riccio” edhe një numër të madh personash të dyshuar si të përfshirë në trafikimin e lëndëve narkotike. Policia italiane, gjatë operacionit “Riccio”, arriti të sekuestronte 300 mijë euro dhe 130 kg drogë, të llojit heroinë dhe kokainë.
Grupi kriminal
Personat e sipërpërmendur ishin pjesë e një grupi prej 38 personash, që përbëhej nga shqiptarë, marokenë, tunizianë e rumunë, që merrej me trafikimin e drogës.
Paratë që përftonin nga ky aktivitet, shqiptarët i nisnin në mënyrë ilegale drejt Atdheut duke përdorur një formë legale. Transportimi bëhej nëpërmjet postës, por edhe nëpërmjet autobusëve që vinin nga Italia në Shqipëri. Paratë fshiheshin nëpër pako me rroba që niseshin për të afërmit e tyre dhe pa u diktuar arrinin në destinacion.
Grupi kishte shtrirje në Italinë Veriore, Spanjë dhe Shqipëri.
