Milani ka pësuar mbrëmjen e sotme humbjen e tretë radhazi në Serie A, duke konfirmuar kështu krizën që ka rënë në kampin kuq e zi.
Fiorentina mundi të zotët e shtëpisë 1-3 duke bërë një paraqitje mbreslënëse.
Në minutën e 13 Bennacer rrëzon një kundërshtar në zonë dhe arbitri Giacomelli akordon 11-metërsh, që realizohet nga Pulgar.
Në pjesën e dytë gjërat përkeqësohen për kuqezintë e Giampaolo-s, pasi Mateo Musacchio ndëshkohet me kartonin e kuq.
Mjaftojnë pak minuta dhe Fiorentina gjen golin e dytë, kur Gaetano Castrovilli përfiton nga një pakujdesi e Donnarumma-s, për të shënuar i qetë. Portieri italian rregullon mbrëmjen e vet kur i pret një penallti Chiesa-s, të fituar pas një faulli të Bennacer, por nuk ia del para ylli francez Ribery, i cili pasi driblon dy kundërshtarë shënon golin e tretë për skuadrën e tij.
Për të ngushëlluar tifozët, Rafael Leao tregon aftësitë e tij kur shënon golin e vetëm për Milan-in, pasi driblon katër kundërshtarë në një aksion individual. Por është shumë pak për kuqezinjtë, që tani e shohin veten në vend të 16 në renditje, me vetëm 6 pikë nga 6 ndeshjet e para të sezonit. /Opinion.al
