Milani ka festuar të dielën 125-vjetorin e tij me një ceremoni të veçantë para ndeshjes ndaj Genoas në Serinë A.
Kuqezinjtë kishin ftuar disa nga legjendat e këtij klubi, duke futur në “Hall of Fame” Filippo Inzaghin, Marco Van Basten dhe Andriy Shevchenko, teksa tribuna ishte mbushur me emra të njohur të së kaluarës si Ruud Gullit, Rijkaard, Seedorf, Evani, Pirlo, Donadoni etj.
Tifozët nuk kanë kursyer duartrokitjet për ta, sidomos kur në fushë zbritën Inzaghi e Van Basten, duke rikthyer edhe një herë koret për sulmuesit që bënin të gjëmonte “San Siro” gjatë ndeshjeve kur ata ishin protagonistë.
Por, në të njëjtën kohë, tifozët patën kritika të rënda për klubin.
“Nderojmë kampionët tanë, simbole të një Milani që nuk ekziston më”, ishte parrulla polemizuese që u hap nga ultrasit kuqezi në tribunë në ato momente.
Dhe për të treguar se sa kundër janë ndaj mënyrës se si po drejtohet klubi, në momentin kur ekrani i madh i stadiumit fokusoi Zlatan Ibrahimovic në tribunë, shpërthyen vërshëllimat nga i gjithë “San Siro”.
